corrosi ci siamo corrosi
ricordi ci siamo rincorsi
Prendimi per mano andiamo a bestemmiare
fuori dalle chiese paleocristiane
neoclassiche bizantine barocche gotiche
riscriviamo le nostre bibbie eretiche
Alberto Dubito, Corrosi ci siamo corrosi, Milano, Agenzia X, 2012, consultabile in albertodubito.it | Foto di Alberto Dubito
De sto anno pastrocià me porto casa tante storie, de quee che no se vive sua pee ma sua testa. Quea testa dura e bastarda come tante che gira par e tere un fià umide e un fià de sassi e sporchesso che xé el Veneto. Sto domiaevinti me ga portà e storie dea autonoma Federica e de l’omerico Pennacchi.
Xé scominsià con Ciao Teroni e xé ndà vanti co e storieviveevenete. Me gero desmentegà de quea sensasion strana che sentivo drio e recie quando che passavo el cavalcavia dea Vempa. A Mestre. El posto che tuti i Veneti odia, perché xé una scatarrada sul merleto dee isoe strambe de mie anni e passa, che saria un orgoglio ma xé anca un peso.
Mi so cressuo visin a Maccaé, in via Napoli, co un nome che pareva na beffa. Me nona xe incassava come na bissa quando che ti ghe nominavi “garibaldi”: chel porco! Gera i anni dell’odor de pasta scotta che veniva da Marghera e da Malcontenta. Gera i anni dee corse in bici sue terre bianche visin a San Giuliano, distanti dai singari che i stava tra ea discarica e a Canottieri Mestre e a Voga Veneta Mestre. Ani dopo go capio ea strana vita dei venessiani de tera, scampai o - spuai - dae case che gera ormai dei ricchi. Me mama me contava che in Cae dei Sartori, sul stesso palàso ghe stava iori, quasi povari, e naltra famegia de quasi nobii. Venessia ea gera cussì: insieme quei che i gera, quei che i xe stai e quei che i xe deventai. Co i schei. I schei no rivava dae fabriche, al massimo dae fornase o dai negossi. E gera 40 ani fa. Desso xé ricordi e rimpianti, sempre più cativi.
Dopo, quando che xé rivada ea patente, el me Veneto xé deventà Padova e el Ventitrè, el Plan 9 de Limena, ea Fornace de Mestrino (quando che ghe gera jazz 5 sere su sete), Treviso co ea toxe e el Disco Frisco, un fià Vicensa. Belluno ea go vista da sposà, co ea casa de Auronzo - caput mundi - e Tre Cime. Che bee. Che serie, rosse d’istà e incassae d’inverno. Par mi e xé el specio del Veneto. E Tre Cime xé in Comune de Auronzo, ma se vardé ben el profio più conossuo xé queo dal lato de San Candido. E Drei Zinnen. Ma ndé cagar. E go viste adirittura sua serie S.H.I.E.L.D dea Marvel. Dal lato dea Pusteria, so morti. Parché el Veneto xé questo: ricordar, pretendar e farse ciavar. Ghe xé sempre altri problemi, e sopratuto un senso de arrogante inferiorità. Semo ancora gente de tera.
No tera tera, piuttosto quei che i varda in basso quando che i sente discorsi astrusi, ma che i varda in alto quando che ghe xé da ndar vanti. Semo quei che i ga da un posto a Galileo, semo quei de Sarpi e de Tiziano. Semo i grezi romantici del Tanko Marcantonio Bragadin 007. E Bragadin el xé queo dea resistensa e del martirio a Famagosta, storie de quasi sinquesento ani fa, ma che ea xé ancora ea natura del Veneto: resistensa e martirio. Ea nostra epica.
Ea epica del studio. Ea epica dell’arte. Ea epica dee montagne e dee acque. Ea epica dee paroe. Ea epica dell’impresa, del capanon. Questa xé stada el nostro martirio. Se e prime e xé ancora resistensa, co l’ultima se semo messi su ea pira del sacrificio ai schei. Quea del veneto no ea xé gola o avarissia, ea xé ira e superbia: sò nel mio el dise ben Balasso (vardeve anca Ercole in Polesine). Ea ira ea xé quea de Achille che ve conta Pennacchi (ghe xé anca ea seconda parte su l’Odissea). El Veneto xé fato de gente impastada de resistensa, martirio, ira e superbia. E Bestemie elevate a meme da Germano Mosconi.
Gavemo provà a scampar dall’epica nostra coi Pitura, credendo che co un fià de canoni podevimo essar Giamaica. Ma qua no se core forte, al massimo se voga e se spénxe. In Veneto se fa maratone de fadiga, perché ea fadiga misura l’omo. L’omo in senso de mascio e de dòna, perché qua ea famegia xé matriarcae. E dòne e xé ea mare ea nona, quee che te petena co na savata o co na tirada de oci. E mare, none, papà e noni i xé morti in tanti par sto casso de COVID. Naltro toco de epica che xé drio ndar via.
In un mondo che xé fatto de furia e futuro, el Veneto - ancora - el varda e so scarpe, che e xé grosse. Semo fati par resister e crepar co onore e merito. Semo ancora linea de trincea. Semo ancora e paroe lievi e tronche de Zanzotto e Meneghello. Semo ancora e barre e i versi de Alberto. Restaremo sempre Disturbati dalla CUiete.