Mi ve sento in campo Santa Margherita, in piassa dei Signori, in quea dee Erbe e in tanti altri bacari, eà col bicèr in man e ea mascherina sul comio. Mi ve sento ghesboro… i ne dixe de meter ea mascherina, e mi come casso bevo el spriss… ziocan. Ve sento che toé par cueo queo chel mostra el teefonin co ea app Immuni: xé rivà el fenomeno! E ve sento anca quando tra de voialtri, in un canton, ve dixé ma che casso xé sta Immuni, gò provà a scaricarmea daeo stor ma no go capio un casso. Queo che so, xé che no vogio che i me controea!
Ecco. Sensa farte ea paternal, te digo come che ea vivo mi e dopo fa queo che ti vol.
Che casso fa Immuni
Na roba stupida, ma che se ea femo a man deventemo stupidi noialtri: Immuni se ricorda de tutti i teefonini che ga avuo vissin a più o meno do metri par almanco quindese minuti. Se quei atorno a ti ga Immuni, ea app salva soeo sul teefonin dea persona un codice de staltri teefonini. Quando uno el dixe su ea sua Immuni chel xé positivo al COVID-19, ea app te manda un avviso: ciò caro, saria megio che ti senti el dotor, parché un fio che te xé stà vissin par almanco quindese minuti, el ga avvisà chel xé positivo. Né ti, né lu, né staltri savarà quando, dove e chi ga segnaeà ea positività. Riassunto: Immuni tien conto de tute e persone che te stà tacae par almanco quindese minuti e se uno ga segnaeà de esser positivo, te manda un avviso de ciamar el dotor, sensa dirte chi, dove, come e quando.
Ti te risparmi ea rotura de cojoni
Intanto noialtri gavemo ea fortuna de essere in Veneto, dove semo stai bravi, quindi vardemo de no esser mona al secondo turno. Ea roba che me gero pensà xé stada: ma se mi incontro uno positivo e Immuni meo dixe dopo, do robe: 1) che casso gera fora el cancaro positivo 2) che casso ti me eo dixi dopo, che intanto so sta ciavà. Me mugèr, che ea xé più inteigente de mi, me ga dito magari quello che poi è risultato positivo, quando vi siete incontrati non lo sapeva ancora, ma intanto Immuni ha tenuto conto di tutti i tuoi contatti e quindi può costruire più facilmente la rete dei possibili contagi. Infati, queo che i dixe poco, xé che quando che ti sta mal, in ospedae i te domanda subito ea lista de tuti i posti, e persone e i tempi di dove ti xé sta nei ultimi quindese giorni. Se ti xé come mi, no ti te ricordi manco dove che gero quindese minuti prima. Ea figada de Immuni xé che se te capita de esser positivo (e tochemose i cojoni), in ospedal ti ghe dixi ciapa el codice de Immuni, e dame na man co sta maeatia. Riassunto: Immuni te risparmia de romperte i cojoni a ricordarte a chi ti xé sta vissin e dove, e te avisa prima se qualchidun te xé sta visin e dopo el ga scoverto de esser positivo.
Dove che ti va i xé cassi tui
Immuni no ghe ne ciava un casso de dove ti xé sta. Ghe interessa soeo che i teefonini che xé stai vissin per almanco quindese minuti. Fine. Se pol dir che a Immuni e persone no ghe interessa. Quindi chi xé, chi no xé, dove chel gera, no importa: importa soeo un codice che se registra soea lista sul teefonin. Infatti, tuti sti codici de teefonini che xé stai vissin al tuo, sta lista par capirse, ea sta soeo sul to teefono: no ea va in giro par computer dea Poissia, dell’ULS… dea Finansa… de to morosa o to mugèr. Ea lista sta bea nascosta e sicura dentro a tua app Immuni, sul to teefonin. Ogni tot de tempo ea tua app Immuni ea controea i codici de teefonini che ga dà avviso de positività; se uno de quei numereti xé sua tua lista eora te manda l’avviso de ciamar el dotor. Ah… me desmentegavo che se ti vol ti pol metar Immuni in modaità “disattivata” par un certo tempo e dopo impissarla de novo. Riassunto: Immuni no te controea, se ricorda soeo i codici dei teefonini che xé stai vissin al tuo. Né ti né staltri i pol saver gnente, perché e liste dei codici ea sta soeo sul to teefono. No ghe xé nessun numero chel va in giro par i computer.
Queo che sucede dopo xé na rotura de cojoni
Eh… ma quando che Immuni te dixe che ti xé sta vissin a un positivo, ti ga da scomininsiar tuta ea trafiea co medici, carte… e me toca meterme in ferie, perché se no so de aver el COVID no i me dà i giorni de maeatia Eora, intanto te conto queo che go vissuo mi, magari me xé andada ben ma intanto te digo che quando che me fia gaveva un sospeto, go ciamà ea dotoressa ae nove e meza de matina del luni (go dovesto spetar 30 minuti al teefono, ma xé un altro discorso) e ae undese i me ga ciamà dall’Angeo ne xé rivada una segnaeassion de sospeto, dine nome e cognome e età dea persona, dopo, sicome ea fia no ga freve, ti vien in machina soto el parchegio dell’Angeo (dae parte de a Banca dei Oci) che ghe femo el tampon sensa gnanca smontar. Fato el tampon ae quatro del luni, ae sinque del marti i ne ga ciamà par dirne che gera negativo. Me mugèr me ga dito che ghe xé un codice che se usa par i giorni de quarantena che no te cava stipendio e no xé giorni de ferie. Riassunto: ea trafiea dopo che te riva un avviso de positività el xé veoce e no ti perdi giorni de ferie e de stipendio.
Se no ti te fidi ti pol vardarte el codice
Se ti xé uno che smaneta con codice, tien conto che el xé tuto open e ti pol vardar come che funsiona ea app e tuta l’architettura de comunicassion e de rievamento. Questo par esempio xé el repository (ea cartea dove che ti meti codice che un computer fa funsionar) del sistema che crea ea lista dei teefonini esposti a possibie contagio. Riassunto: Immuni xé tuta in ciaro, anca el codice. Se ti ga boresso ti teo vardi e ti teo studi.
El lavoro va rispetà
All’inissio anca mi gero diffidente (e gavevo scritto e parlà) ma aea fine Bending Spoons, che xé l’azienda che ga fato Immuni, oltre a no farse pubblicità i ga dà tuti i diritti e copyright alla Presidenza del Consiglio, co na licensa aperta, par far far aea gente anca altre applicassion. Sti fioi i gaveva fato una prima version dea app, ma quando che e varie persone esperte (fora dai giri deo Stato, ma tuti impegnai nea trasparensa e nea privacy, quindi avvocati, ativisti e programatori) ghe ga dito che i dati no doveva andar in giro, che ea privacy dee informassion doveva essere sempre e soeo dea singola persona, quei de Binding Spoons i ga fato tute e modifiche e i xé ancora drio a far manutension e controi che tuto funsiona. Riassunto: qui in Veneto el lavoro xé sacro e drio Immuni ghe xé tanto lavoro, sia de quei che ea ga fata, sia de quei che i ne cura. Fè i bravi, no ste far i mona, mettevea sul teefonin e attivea.
Sani :-D
Ea foto xé ciapada da qua
