foto del post

Go visto ‘sto tuit che xé beo forte.

Insomma, el dixe aea fine:

Il motivo apparentemente era che il database è gestito in Excel e il numero di colonne aveva raggiunto il massimo.

Pararia che anca in UK invense de doparar un benedeto database i usa un casso dei fojo excel. E se el fojo excel se incroca e te dixe “caro, forse no ti gá capio che fin a un certo punto rivo, dopo i xé cassi tui se no ti sá doparar un database”, vien zo tuto. Capimose: grassie Bill Gates e fioi de Microsoft che gavè inventà l’excel, ma xé un “foglio de calcolo” dove ti buti dentro numari e dati per far calcolo no par gestir informassioni complesse e articolae.

El gestionale

Quando che ghe xé dee liste de ordini, de roba in magazin, de un inventario, nel dubio i te dixe “buta tuto in un excel”. Quando che el paròn o queo che dovaria “capir de computer” i pensa che un fojo excel xé massa grezo, ecco che riva el comercial de na dita informatica che ghe spacia el gestionale©. E qui scominsia i cassi acidi. El gestionale© xé na bestia metà excel metà php, in pratica del codice butà sù par farte lavorar su un excel sensa che ti eo vedi. I te mostra la semplice e bella interfaccia grafica che aea fine xé na tabea coi fiocheti, dove ti buti dentro roba che finisse sempre su un excel.

Dove sta ea ciavada

Perché piase tanto el gestionale©? Parché chi eo compra gà l’impression de aver qualcossa in man, de concreto, parché el gestionale© te eo instaea nel computer che ti gà in ufficio. E ti paghi un tot par el numero de computer che ti gà. E ti pensi che el gestionale© sia tuo. Pecà che i te dixe de far ogni tanto el salvataggio in cloud, che vol dir inviar ea version degli excel che sta da drio de ogni gestionale© su ogni computer, ad un computer online dea dita che te eo gà venduo, dove che eori i te allinea i vari excel su uno unico. Se i xé più bravi i se salva tuto su un database. Ti te gà perso? Ben, xé queo che i vol quei che te eo vende. Roba che se el paròn o queo che dovaria “capir de computer” i fusse un fiantin più furbi i voria da subito: fame na machina su Amazon AWS, o Google Cloud o Microsoft Azure, co dentro un database dove che se coega tuti i computer dell’ufficio e che i scrive tuti sul stesso posto. El database dopo ghe pensarà lu a no sovrapor e incasinar queo che ghe buta dentro. Questo xé uno svegio che ragiona.

E l’excel?

Miga ve so drio dir da butarlo via! Ve digo soltanto de tenir conto che ghe xé metodi e solusion che vien doparae da tanti ani, ma che quando che e conto i me varda come un alieno. No xé robe da maghi, qualsiasi amigo informatico ve dirà ghesboro, ma queste xé e basi!, ma intanto pochi e conosse. Xé robe che quando che ve mostra un prodotto par l’azienda, dové sempre domandar che ghe sia! Intanto ve meto ea lista, dopo ve scrivarò dei apunti cussì ve serve da promemoria:

Se vedemo

ps: Ah… me desmentegavo che dovarò contarve anche ea storia degli applicativi online©, nel caso ricordemeo ;-)

Ea foto xé ciapada da qua