Staltro giorno ve go dito de no far i mona e metterve Immuni nel teefonin. Bon. Siccome no só vegnuo zó coa piena, so anca che xé queo che vien dopo ea notifica che preocupa.
notifiche e responsabiità
Quando che ea nona te minaciava co na savata, ti savevi che no te ea tirava. Se te riva ea notifica ma ti sa che dopo i xé cassi tui, col casso che ti te instai Immuni? In parte xé vero queo che dise ea Azzolini sua disorganisassion che sta drio aea app, ma xé anca vero che tuta ea rede de contatti xé diffissie da ricostruir. Quindi semo intesi che serve sopratuto a questo, ma el dopo xé ea soita question de integrassion. Vedemo un fià.
Robe che no se parla
Ve conto ‘sta storia (che no ea xé grossa come quee dea Federica). Me mama ghe vien ea freve, ea ciama el dotor che ghe dixe “spetemo a far el tampon”. Ma siccome me pare xé a riscio ghe dixe al dotor che saria importante e lu ghe risponde “fateo privatamente”. Ben. Gnanca tanto parché i xé 60€, ma nimporta. Ea va’ in una clinica privata, convensionada con tuto el sistema regional, ea fa el tampon. Ea roba bruta xé chel risultato no viene invià diretamente al sistema regional, gá ea da ritirar ea carta, girarla al so dotor che dopo lu ea manda al database regionale (sperando che no sia un excel). Questa no ea xé integrasion. Integrasion xé quando daea clinica i risultati e i numari dei tamponi i vien scriti diretamente sul stesso database che vien letto da tuto el Sistema Sanitario Nasional. Sensa romper i cojoni ai dotori e sensa affidarse ae persone che magari e se desmentega, o, pezo, no vol dir che i xé positivi parché ghe crea casini.
L’inteigensa no ti pol afidarla ae machine
Saria come comprar un mueto e spetarse che vada in giro lu par el capanon a spostar roba in maniera inteigente. Ve piasaria, eh?! Gnanca quei robotizai, gnanca el robò rumba che gavé in casa funsiona cussì. El rumba ogni volta che eo stué el se desmentega come che xé fata ea casa: ea bravura chel ga xé quea de reimparar veocemente e netar par tera ad un ora impostada. Parché xé sempre question de come e in quanto tempo ti impari e robe.
Come che ti impari xé come che ti spieghi
Qua in Veneto conta ea fadiga. De brassi e de schiena. Quea de testa xé par i dotori de Padova, ma ormai se ti gá un computer se sà che el problema xé queo che sta tra el monitor e ea sedia: el problema ti xé ti. Se no ti sà come far un sistema che fassa dee atività in automatico, se no ti sà cossa che ti vol come obietivo, ciavà ti geri prima, beco ti diventi dopo. Immuni xé un esempio che riguarda tante aziende e uffici sparsi in Veneto e in tuta Italia. Igai a fornitori ossessionai a venderte tochi che fa robe diverse, ma che no i se parla tra de eori, ti te ritrovi col gestional dee fature che gà da esser eo stesso del commerciaista, ma se el fornitor ne dopara un altro vien xò tuto. Prima ti gá da saver cossa ti usi e chi gá da dapararle, e dopo ti compri.
E quindi?
Femo conto che ti gá un sistema gps che te registra i giri che fa i furgoni dea azienda. Ma el sistema no se coega col queo che gestisse i turni dei autisti. E che no parla col sistema che gestisse i rimborsi chiometrici. Se no te vien ea ditta che te vende el famoso “pacchetto completo integrato” ti gá da pagar uno o più aministrativi che se scrive, su un excel, i dati che te spua fora i vari gestionai. Cossa di dovaressi far? Prima de comprar qualsiasi roba, ti gá da domandar: “el gestionale che me proponè gá un bocheton che spua fora i dati in un formato standard?”. A sto punto el comercial dea dita te vardarà come un mato e dirà “devo sentire il reparto sviluppo”, e ti savarà de aver sfiorà ea ciavada. Quindi ti, caro el me paròn o “queo dei computer”, fa na bea roba: tien caro in azienda un fio che gá un unico incarico: ogni dato che gira nei gestionai gá da andar in giro sensa roture de cojoni e sensa costi de abonamenti e altre putanae. Altrimenti ti xé come lo Stato Italiano, che afida servissi e gestionai e dopo no sà un casso de queo che succede.
In conclusion
L’integrassion xé el cavatappi che te verse qualsiasi botiglia. El cavatapi ti pol esser ti che ti gá ben presente el sistema che te serve e queo che ti vol saver, o uno che ne capisse de programmi e codice e ti ghe dixi ben queo che ti vol. Perché no ghe xé niente de pezo de aver na botiglia e no poderla verser.
Ea foto xé ciapada da qua
