Ae 22:39 del 9 otobre 1963 xé venio xò 270 milioni de metri cubi de masegni e tera su Longarone, Codisago, Castelavazo, Erto e Casso. Dopo xé venui xò milioni de agreme e paroe. E dolor. Tanto.
Aldeà dea storia che xé ben elencada sua vose de Wikipedia e da Paolini da far piànzer, resta na storia de tennoeogia, tecnici, burocrasia e de considerar e persone dee bestie da tenir in un recinto. Coa scusa de “ea gente no capisse”, già nel 1960 i tecnici dea SADE e i vari profesori se rimbalsava perissie, reassioni, modei ma intanto el Toc se ne ciavava e continuava a moverse, e tanto. Parché ea realtà va a brasseto coa Natura e i omeni ga da scoltarle, tute do e no pensar de comandarle.
Queo che te casca in testa
El progeto del “Grande Vajont” partiva dal ‘29 col scopo de aver energia diversa da quea che vien dal carbon. Quindi i pensava de sfrutar quea dell’acqua. Ma se ti frachi l’acqua in una vae visin a un monte che se ciama Toc, che vol dir Toco, “pezzo” o in furlan Patoc, “marcio, fradicio”, no xé difisile che se rompa i cojoni el vien zò. Ma fintanto che i se desbrasolava coe paroe dite e scrite, ea Tina Merlin ea scriveva nel 20 febraio 1961 Un’enorme massa di 50 milioni di metri cubi minaccia la vita e gli averi degli abitanti di Erto. Do ani prima. E al 4 novembre del ‘60 ghe gera stada na frana. El 9 otobre de 57 ani fa ghe xé cascà in testa no soltanto sassi, tera e acqua, ma anca l’anda de quei che saveva e no ga voesto meter drio i interessi rispeto a ea realtà.
Bisogna saver e saver spiegar
Ea storia xé sempre ea stessa: ghe xé quei che ga pratica coa sciensa e i sà che xé un vanti e indrio de ipotesi, verifiche, test e anaisi. Ea sciensa no gà verità, gà teorie e modei che funsiona fin prova contraria. Dirghe a un sciensiato “cossa ghe xé de certo”, lu te rispondarà, se el xé serio, “mi no lavoro coa certessa, ma con probabiità e possibiità”. Quindi ai esperti xé da dir, sempre, “no gò capio, spiega mejo” e su queo che te dixe ti ti gà da sceglier qual riscio xé più vantagioso.
Costi de far e quei de no far
In termini de efficiensa e efficacia. Nel caso del Vajont, meter in conto i costi de risparmio sul comprar carbon, e quei par rimeter a posto i danni, doveva esser messi sua stajera. Ma xé sempre ea stessa storia: quando che i te dixe “varda che presto o tardi ti dovarà farte un sistema de gestion digital fato ben” e ti ti pensi che ti xé ndà vanti ben fin desso, dopo no ti pol sbraitar chel coronavirus te bloca i dipendenti a casa a no far un casso. Se queste xé putanae rispetto al Vajont, ea base xé quea comunque. Spetar, sperar. E dopo pianzer. I costi de far e quei de no far xé sempre ligai a cossa di fa. Prima de far na roba granda, va sempre par gradi che xé el metodo che i gà usà par far aziende come Google, Amazon, Facebook e compagnia cantante.
Usa el metodo dei sciensiati
Te go dito come che lori i va vanti: ipotesi, verifiche, test e anaisi. Ecco. Date un obietivo grando, ma fato de tanti picoi passeti. E ogni volta controea, nel caso modifica, e va vanti. I fighi eo ciama “metodo agile”, i nostri veci eo ciamava bon senso e eo usava sui campi e coe bestie.
Disastro e comprendonio
Go parlà de metodo e de scelte parché me par che anca se xé passai tanti anni semo sempre eà, a dividerse tra tifoserie, tra i complotti e verità. Purtropo ea realtà xé sempre stada complessa, no xé desso che eo xé deventada. Queo che xé cambià xé e robe che savemo in più e bisogna saverle gestir, spiegar e aplicar. Co pasiensa e co responsabiità. Quaità che xé sempre stae rare.
ps: se me dixé ciò ma el tempo core, a na certa di gà da desidar, mi ve digo che xé vero, ma se se va par picoi passi pratici e se discuti soeo de quei, vedarè che el tempo basta.
Ea foto xé ciapada da qua
