Ve gavevo scrito che gavaria zontà un fià de roba. Eora partimo dal controlo de version. Xé na roba plu de conceto parché dopo riva el zogatolo che eo mete in pratica. Partimo da ea necessità: quando che i informatici gá scominsià a scriver codice uno da na parte e uno da naltra usando internet, i doveva fatigar su tochi de programmi sensa aver un casin de copie. No i podeva mandarsei via mail, parché ghe gera massa roba e i scriveva massa veoci. Quindi i ga pensà de scrivar tuti sul stesso file, zontando roba tacada ad un numerin che tenisse traccia dea version che i gera drio far. Toni scrive na riga e xe na version, Bepi mete posto na virgoa e xe naltra version. Se Nane vede che Bepi gá fato na cassada, ecco che recupera ea version de Toni e torna tuto a posto.
Ea version de Linus
Tuto nasse da quel rabioso de Linus Torvalds, che ga inventà Linux. Che casso xe Linux? Xe ea base dei sistemi operativi GNU/Linux che manda vanti praticamente quasi tuti i computer che xé i server, che quando xe accessibii online i vien ciamai “server”. Linus se gera roto i cojoni de usar Windows e voeva controear tuto e far che tuti potesse far quel casso che i voeva: ga scrito el codice del novo kernel in maniera aperta e eo ga ciamà Linux. Siccome i gera tanti che ghe piaseva, ecco che Linus ga dito “casso, no mandeme mail co tochi de kernel, metè tuto in condivision che dopo sistemo mi!”.
El benevolo ditator
Magari pensarè “ciò, casso, cussì tuti i fa casin e e robe scrite da tanta gente xe inutile!” Linus, che gera bon parché dava gratis a tuti el so codice del kernel Linux, no gera cojon quindi gera lu che approvava e modifiche, e zonte, e persone che scriveva e cassava fora quei che rompeva i cojoni. Infatti eo ciama “el ditator benevolo”. Parché ea roba bea del controlo de version xe che chi comanda no xé queo che fa da paròn ma queo che attraverso i tochi che vol mandar vanti, e robe che dixe “e va ben” o “queste no”. Comanda chi sa, sa far e chel mostra come che fa lu. In pratica xe el maestro dea botega, dove che assa rubar col ocio el so mestier, parché el gá do vantagi:
- altri che da na man a far dee robe che lu no riussiria a mandar vanti
- impone el so mestier a dee persone che magari dopo podaria ciamar a fatigar par lu.
Giusto par capirse, nel 2011 i ga stimà un costo de produsion del Kernel Linux de 612 milioni de dolari, se eo gavesse fato con una azienda privata. Invense eo ga fato in maniera colaborativa, e tuti i ga el so prodoto.
version e controlo
Un esempio clamoroso xe Wikipedia, dove tuti i pol scriver qualsiasi putanada, ma dopo ghe xe altri che controea è robe. Qui trovè ea lista de version dea vose “Veneto” (ghe xe anca in lingua veneta). Queo che xe da ficarse in testa xe che co sti strumenti se cambia anca el metodo sensa perder tempo i ciacoe. Se lavora diretamente sue robe e chi imposta el progeto, che sia un codice informatico, che sia un lavoro nei campi, o un prodoto, sfrutando ea condivision e el controlo de version impone ea so version. Quindi lu controea sia ea produsion che el mercato, sia de chi compra che de chi produse.
Fe pujto, e ricordeve queo che se dixe sempre: quando che ti scrivi codice xe obligatorio bestemiar. Perfeto.
Ea foto xé ciapada da qua